Adran Gwasanaethau Cyfreithiol a Chyflogaeth
Aelodau’r Adran Gwasanaethau Cyfreithiol a Chyflogaeth yw: y Llywydd, yr Is-lywydd, yr Ysgrifennydd Cyffredinol a thri aelod arall a etholir gan y Cyngor Cenedlaethol.
Prif gyfrifoldeb yr Adran yw estyn cyngor a chymorth (yn ddi-dâl) i aelodau UCAC ar faterion sy'n berthnasol i'w swyddi, trafod materion cyfreithiol a materion eraill sy'n berthnasol i aelodau yn eu gwaith, a phenderfynu ar y ffordd orau a mwyaf effeithiol o weithredu ar y materion hyn. Mae gohebiaeth â’r Adran hon yn gyfrinachol rhwng yr aelod a swyddogion yr Adran.
Ni ellir trosglwyddo achos i gyfreithiwr heb ganiatâd yr Adran. Mae gan UCAC rwydwaith cenedlaethol o gyfreithiwr i sicrhau gwasanaeth cyflym ac effeithiol i’w aelodau. Os yw UCAC o'r farn y dylid trosglwyddo'r achos i ystyriaeth cyfreithiwr, bydd disgresiwn gan yr Adran pa un ai derbyn cyfarwyddyd y cyfreithiwr ai peidio. Os penderfyna'r Adran ollwng achos yr aelod am unrhyw reswm hysbysir y Cyngor Cenedlaethol o’r penderfyniad hwn.
Gall UCAC wrthod gweithredu ar ran aelod oni chydymffurfia'r aelod â'r amodau canlynol.
| (a) |
Rhaid iddo fod yn perthyn i'r categori o aelodaeth gyflawn yn ôl y diffiniad yn Rheol 4 y Cyfansoddiad.
|
| (b) |
Rhaid iddo fod wedi talu ei dâl aelodaeth gyfredol. |
| (c) |
Rhaid iddo gydymffurfio â Chod Ymddygiad yr Undeb. |
| (ch) |
Ni ddylai weithredu ar ei ben ei hun mewn unrhyw fodd. |
|
(d)
|
Unwaith i’r mater cael ei drosglwyddo i ofal yr Adran, ni ddylai ohebu â'i gyflogwr nac â chyfreithiwr yr Undeb ynglyn â'i achos; dim ond Swyddog UCAC ddylai gysylltu â chyfreithiwr ar ran aelod.
|
| (dd) |
Ni ddylai wneud datganiadau cyhoeddus ynglyn â’i achos. |
| (e) |
Ni ddylai weithredu mewn unrhyw ffordd yn erbyn cyngor y cyfreithiwr. |
Hysbysir yr aelod o'r modd y mae ei achos yn datblygu.
Gall yr Adran neu’r Cyngor wrthod cymorth cyfreithiol mewn mater a ddigwyddodd cyn y dyddiad ymaelodi. Gall yr Adran neu’r Cyngor hefyd ofyn i'r aelod arwyddo datganiad ysgrifenedig ei fod yn ymrwymo i gydymffurfio â'r amodau uchod. Ysgrifennydd yr Adran yw'r Ysgrifennydd Cyffredinol.