Ionawr 2026 

Mae'n gyfnod o ddechreuadau newydd - blwyddyn galendr newydd a thymor newydd!  

Dyma gyfle newydd, felly, i roi blaenoriaeth i les holl staff yr ysgol.  Dilynwch y ddolen isod ar gyfer adnoddau dwyieithog gan Education Support.   Mae yma adnoddau penodol ar gyfer cynorthwywyr addysgu a chynorthwywyr cymorth dysgu,  ond cofiwch hefyd fod Education Support yn cynnig gwasanaeth i holl staff yr ysgol.  Mae modd cofrestru ar gyfer Gwasanaeth Cynghori ar Lesiant a Gwasanaeth Goruchwyliaeth Broffesiynol.  Mae'r gwasanaeth hwnnw wedi ei ariannu gan Lywodraeth Cymru ac nid oes unrhyw gost i chi na'ch ysgol.  

Support for TA's & LSA's - Wales toolkit

Dilynwch y ddolen....darllenwch y deunydd.....dywedwch wrth eraill am yr adnoddau hyn!  

Hydref 2025

Ym mis Mai 2026 byddwn yn pleidleisio yn etholiad Senedd Cymru. Pa neges hoffech chi ei rhoi i wleidyddion Cymru? Mae UCAC wedi paratoi ei maniffesto ar gyfer yr etholiad.

Ein prif ddyheadau ni fel undeb ar gyfer addysg yng Nghymru yw:

UCHAFSWM ORIAU GWEITHIO WYTHNOSOL
Sicrhau bod ffiniau pendant i ddiwrnod gwaith addysgwyr

CYLLID YSGOLION
Sicrhau bod ein hysgolion yn cael eu cyllido'n deg, fel bod digon o staff a digon o adnoddau

AMODAU GWAITH
Sicrhau bod addysgwyr yn gallu canolbwyntio ar eu priod waith - addysgu plant a phobl ifanc

CYMRAEG
Sicrhau bod statws haeddiannol i'r Gymraeg a bod cyfleoedd realistig a gwerthfawr i hybu ac ehangu'r defnydd ohoni

Er mwyn darllen y maniffesto yn llawn, pwyswch ar y llun isod. 

Medi 2025 

Ydych chi'n dysgu drwy gyfrwng y Gymraeg neu'n addysgu Cymraeg fel pwnc mewn ysgol uwchradd? 

Efallai fod cyfle i chi dderbyn bwrsariaeth o £5,0000. 

Darllenwch isod i weld a ydych yn gymwys. 

BWRSARIAETH CADW ATHRAWON CYMRAEG MEWN ADDYSG

Pwy sy’n gymwys?

I fod yn gymwys ar gyfer y fwrsariaeth, rhaid i athrawon fodloni’r meini prawf craidd canlynol:

• ennill statws athro cymwysedig (SAC) o fis Awst 2020 ymlaen
• wedi cwblhau 3 blynedd o addysgu yn dilyn dyfarniad SAC
• wedi cychwyn ar 4edd flwyddyn o addysgu
• wedi cwblhau naill ai 3 blynedd o addysgu Cymraeg fel pwnc mewn unrhyw ysgol uwchradd neu ysgol ganol a gynhelir yng Nghymru neu unrhyw bwnc drwy gyfrwng y Gymraeg mewn ysgol uwchradd neu ysgol ganol cyfrwng Cymraeg neu ddwyieithog a gynhelir

Mae’r meini prawf yn berthnasol i athrawon llawn-amser a rhan-amser, lle bynnag y maent ar y raddfa gyflog athrawon a p’un ai eu bod yn cael lwfansau cyfrifoldebau ychwanegol neu beidio.

Nid yw athrawon mewn ysgolion annibynnol, colegau chweched dosbarth neu sefydliadau addysg bellach yn gymwys ar gyfer y fwrsariaeth.

Sut i wneud cais

Bydd y cyfnod ymgeisio yn agor ar 1 Medi 2025 ac yn cau ar 30 Medi 2025.

I wneud cais, rhaid i athrawon lenwi’r ffurflen gais. Rhaid cyflwyno ceisiadau drwy e-bost i Mae'r cyfeiriad e-bost hwn wedi'i warchod rhag robotiaid sbam. Rhaid i chi alluogi JavaScript i'w weld..

Mae’n rhaid i athrawon gyflwyno cais o fewn 2 flynedd o fod wedi cyrraedd y 3 blynedd angenrheidiol o wasanaeth.

Manylion talu

Bydd ymgeiswyr llwyddiannus yn derbyn £5,000 yn ystod eu 4edd flwyddyn o addysgu, gyda Llywodraeth Cymru yn talu’r holl gyfraniadau treth ac Yswiriant Gwladol. Nid yw’r fwrsariaeth yn bensiynadwy.

Mae rhagor o wybodaeth am gymhwysedd a sut i wneud cais ar wefan Llywodraeth Cymru neu trwy gysylltu ag Mae'r cyfeiriad e-bost hwn wedi'i warchod rhag robotiaid sbam. Rhaid i chi alluogi JavaScript i'w weld..

Awst 2025
 

Mae Llywodraeth Cymru yn cynnig bwrsariaeth o bum mil o bunnoedd i annog athrawon Cymraeg a chyfrwng Cymraeg i aros yn y proffesiwn. Os ydych chi'n athro/athrawes uwchradd cyfrwng Cymraeg neu'n athro/athrawes sy'n addysgu Cymraeg fel pwnc, dilynwch y ddolen isod i ddysgu mwy am y fwrsariaeth.  Ac os ydych chi'n gymwys, dilynwch y ddolen sydd o dan y canllawiau, er mwyn cael ffurflen gais.     

Mae’r Fwrsariaeth yn gynllun peilot a fydd ar gael hyd ddiwedd 2028. 

Darllenwch y canllaw yn ddiymdroi - mae hwn yn gyfle rhy dda i'w golli!

Cynllun Bwrsariaeth Cadw Athrawon Cymraeg mewn Addysg 2025: canllaw [HTML] | LLYW.CYMRU


Ffurflen gais: Cynllun Bwrsariaeth Cadw Athrawon Cymraeg mewn Addysg | LLYW.CYMRU

Mehefin 2025 

Yn sgil cyhoeddiad Llywodraeth Cymru yr wythnos ddiwethaf yn cynnig codiad cyflog o 4% i athrawon ac yn dilyn trafodaeth ynghylch y mater mewn cyfarfod o Gyngor Cenedlaethol yr Undeb, mae UCAC yn datgan ei siom. 

 

Er bod y codiad cyflog yn ymddangos, ar yr olwg gyntaf, yn godiad sylweddol, eto i gyd rhaid nodi nad yw’r codiad hwn yn sicrhau bod cyflogau athrawon yn cymharu’n ffafriol â chyflogau eraill ac nad yw cyflogau athrawon wedi dal i fyny â’r cynnydd mawr mewn cyfraddau chwyddiant yn ystod y blynyddoedd diwethaf.  Rydym yn wynebu argyfwng o ran recriwtio a chadw athrawon, ac er mwyn denu athrawon a’u cadw yn y proffesiwn, mae’n rhaid i gyflogau fod yn gystadleuol ac yn apelgar, gan adlewyrchu’r gofynion cynyddol sydd ar y proffesiwn.  Teimlai’r Cyngor Cenedlaethol yn gryf hefyd fod angen mynd i’r afael yn ddiymdroi â llwyth gwaith athrawon a phroblemau ymddygiad yn ein hysgolion.  Dim ond pan fydd athrawon yn derbyn amodau gwaith anrhydeddus a chyflogau teg ac yn derbyn y parch y maent yn ei haeddu y bydd modd mynd i’r afael â’r argyfwng presennol o ran recriwtio a chadw athrawon.

 

Yn ogystal â’r siom o safbwynt cynnwys yr adroddiad, mae UCAC hefyd yn siomedig na lynwyd wrth yr amserlen wreiddiol eleni eto o ran amseru’r cyhoeddiad ac nad yw’r cynnig yn cyfateb i argymhelliad CACAC, sef codiad cyflog o 4.8%.   Golyga’r oedi na fydd unrhyw godiad cyflog yn cyrraedd y gweithlu tan ymhell i mewn i Dymor yr Hydref.  Rhaid mynegi pryder a siom hefyd nad yw’r adroddiad wedi ei gyhoeddi eto yn y Gymraeg ac rydym yn gresynu fod y Gymraeg yn cael ei thrin yn llai ffafriol na’r Saesneg.